നിങ്ങള്‍ ഓഹരി വിപണിയില്‍ ഒരു പുതിയ നിക്ഷേപകന്‍ ആണോ?എങ്കില്‍,നിക്ഷേപിക്കുന്നതിനു മുന്പ്,ചുവടെ പറയുന്നവ ശ്രദ്ധിക്കുന്നത് ഗുണം ചെയ്യുമെന്ന് കരുതുന്നു.
1.ലേശം ചീത്ത പേരുള്ള സ്ഥലം ആണ് ഓഹരി കമ്പോളം.ലാഭം നേടിയവരെക്കാൾ കൂടുതൽ നഷ്ടം വന്നവർ ഉള്ള സ്ഥലം.അതുകൊണ്ടു തന്നെ,വീട്ടിൽ നിന്നോ സമൂഹത്തിൽ നിന്നോ പിന്തുണ പ്രതീക്ഷിക്കണ്ട.കിട്ടിയാൽ,മഹാഭാഗ്യം.
2.നഷ്ടം ഉണ്ടാക്കുന്നത് ഒരു കലയാണ്.ലാഭം ഉണ്ടാക്കുന്നത് ശാസ്ത്രവും.വായിക്കാനോ പഠിക്കാനോ മിനക്കെടാതെ സ്ഥിരതയോടെ ലാഭം നേടാൻ കഴിയില്ല.mbbs പോലും ഇല്ലാത്ത ഡോക്ടർ സർജറി ചെയ്‌താൽ രോഗിക്ക് എന്ത് സംഭവിക്കുമോ,അതാണ് വിശകലനം ഇല്ലാതെ നടത്തുന്ന നിക്ഷേപത്തിന്റെ ഗതി.
3.നൂറു രൂപയുടെ പച്ചക്കറി വാങ്ങും മുൻപ്,നാം അതിന്റെ നിറവും മണവും ഗുണവുമൊക്കെ ശ്രദ്ധിക്കും.കഷ്ടപ്പെട്ടുണ്ടാക്കിയ ലക്ഷങ്ങൾ മുടക്കും മുൻപ്,ഏറ്റവും കുറഞ്ഞത് കമ്പനികളുടെ അറ്റ ലാഭത്തിന്റെ കണക്കു എങ്കിലും അറിയണ്ടേ?ആരുടെ കമ്പനിയാണെന്നും,ഉത്പന്നങ്ങൾ എത്രമാത്രം വിറ്റു പോകുന്നുവെന്നും അറിയണ്ടേ?കഴിഞ്ഞ അഞ്ചു വർഷത്തെ ട്രാക്ക് റിക്കോർഡ് എങ്കിലും മനസിലാക്കേണ്ടേ?
4.ഒരു ലോട്ടറി എടുക്കുന്ന മനോഭാവത്തോടെ ഡേ ട്രേഡിങ്ങിനെയും അവധി വ്യാപാര കാരാറുകളെയും സമീപിച്ചു സ്വയം സൂപ്പർ മാൻ ആകാതിരിക്കുക.പെന്നി സ്റ്റോക്കുകളിൽ നിക്ഷേപിച്ചു ഒരു മാസം കൊണ്ട് ഇരട്ടി നേടാൻ കൊതിക്കുന്നവരും നിരാശപ്പെടേണ്ടി വരും.
5.സ്ഥിരതയോടെ വളരുന്ന കടം കുറവുള്ള കമ്പനികളുടെ ഓഹരി മൂല്യം ഉയരുമെന്നതാണ് വിപണിയുടെ ചരിത്രം.വിപണി മൂല്യം അനുസരിച്ചു അവസാനത്തെ 100 കമ്പനികളിൽ നിന്ന് മുത്തും പവിഴവും തിരയുന്നതിനേക്കാൾ എളുപ്പമാണ്,ആദ്യത്തെ 100 കമ്പനികളിലെ നിക്ഷേപം.തെറ്റില്ലാത്ത വില നോക്കി മാത്രം വാങ്ങുക.
6.നിക്ഷേപിക്കാൻ തീരുമാനിച്ചുവെങ്കിൽ,ബിസിനസ്സുമായി ബന്ധപ്പെട്ട പത്രമാസികകൾ വായിക്കുക.
ബിസിനസ് ലൈൻ,ബിസിനസ് സ്റ്റാൻഡേർഡ്,ഇക്കണോമിക് ടൈംസ് എന്നീ പത്രങ്ങളും ദലാൽ സ്ട്രീറ്റ്,ക്യാപിറ്റൽ മാർക്കറ്റ് എന്നീ മാസികകളും വായിക്കുന്നത് നല്ലതാണ്.
ബിസിനസ് ലൈൻ,ബിസിനസ് സ്റ്റാൻഡേർഡ്,ഇക്കണോമിക് ടൈംസ് എന്നീ പത്രങ്ങളും ദലാൽ സ്ട്രീറ്റ്,ക്യാപിറ്റൽ മാർക്കറ്റ് എന്നീ മാസികകളും വായിക്കുന്നത് നല്ലതാണ്.
7.വെബ്സൈറ്റുകൾ പരിശോധിക്കുമ്പോൾ,moneycontrol.com, investopedia.com
,nseindia.com,bseindia.com,
valueresearchonline.com എന്നിവ നോക്കാൻ മടിക്കേണ്ട.
8.കമ്പനികളുടെ ലാഭവിവരങ്ങൾ നോക്കുന്നതിനു, screener.in,ratestar.in,rediff finance എന്നിവ നോക്കുക.
9.ഒരു സെക്ടറിൽ മാത്രമായോ ,ഒരു കമ്പനിയിൽ മാത്രമായോ നിക്ഷേപിക്കുന്നത് താങ്ങാൻ കഴിയാത്ത നഷ്ടം ഉണ്ടാക്കാം.അതുകൊണ്ടു, നിങ്ങളുടെ നിക്ഷേപം കുറഞ്ഞത് 7 മുതൽ 10 വരെ സെക്ടറുകളിൽ എങ്കിലും വൈവിധ്യവൽക്കരിക്കുക.
10.ഒരു യുദ്ധമോ ഭൂകമ്പമോ നാശം വിതച്ചാൽ തീരുന്ന ഫണ്ടമെന്റൽ മാത്രമേ ഏതു നിക്ഷേപത്തിനും ഉള്ളൂ.അതുകൊണ്ടു,ഇടയ്ക്കിടെ ലാഭം വരുമ്പോൾ,അത് എടുക്കുവാൻ കൂടി ശ്രദ്ധിക്കുക.
